Кораб

Традиционално на 8 Септември, Денот на назависноста на Р Македонија, ПСД „Кораб“ организира искачување на Голем Кораб, највисокиот врв во Македонија. Врвот официјално се наоѓа на надморска висина од 2.764 метри, но според мерењата на јапонски експерти тој е повисок за 88 метри.
Минатата година јас првпат бев дел од оваа масовна акција. Оние што веќе биле таму знаат дека автобускиот превоз е до караулата „Стрезимир“, од каде што се оди пеш до караулата „Победа“, а оттаму започнува искачувањето на врвот.
На оваа акција традиционално учествуваат планинари од повеќе земји. Тука би ги споменала поранешните југословенски држави, Бугарија, Германија, САД, Канада и др. Планинарите од Црна Гора, таа година, дојдоа првпат официјално по осамостојувањето. Многумина од нив доаѓаат повеќе години, таков е случајот со Брацо од Сараево, со кого имавме можност да поразговараме.
За разлика од оваа година, снегот што го имаше лани на врвот и непосредно под него, создаваше една посебна и неповторлива глетка.
Благодарение на ПСД „Кораб“ оваа акција прерасна во традиционален собир на планинарите од повеќе земји, кој придонесува за афирмација на Македонија како погодна дестинација за развој на планинарењето.

Маврово

Маврово е едно од оние места што се еднакво привлечни и во лето и во зима. Она што го прави посебно е совршената хармонијата меѓу езерото и околните планини.
Мавровско Езеро е формирано при крајот на четириесеттите години на минатиот век. Со градењето на големтаа земјена брана на Мавровска Река, била поплавена Мавровската Котлина, а на нејзиното место било формирано езерото. За постоењето на котлината сведочи црквата, која иако поплавена сè уште му пркоси на времето.
Во зимниот период вистинска атракција се скијачките терени на планината Бистра. Веќе неколку години тука традиционално се одржува „Мавровскиот меморијал“, додека детското одморалиште „Бунец“ е домаќин на манифестацијата „Снежен град“.
Доколку доаѓате во Маврово, можете да уживате и во посетата на пештерата Шаркова дупка. Се наоѓа во непосредната близина на зимскиот туристички центар, веднаш под хотелот „Бистра“. Пештерата ја красат сталактити и сталагмити, кои како и повеќето од другите украси имаат црвеникаво-кафена боја.
Денес Маврово станува сè поатрактивна дестинација, која има тенденција во иднина да привлекува сè поголем број туристи.